అమ్మ పెట్టదు.. అడుక్కు తిననివ్వదు అన్నట్లుగా మారింది సామాన్యుడి పరిస్థితి. ఇప్పుడు తెలుగు లోగిళ్లలో పొయ్యి వెలగకుండా చేస్తోంది. పశ్చిమాసియాలో ఇరాన్, ఇజ్రాయెల్ మధ్య సాగుతున్న భీకర పోరుతో గ్యాస్ దిగుమతులు నిలిచిపోయి, అటు కమర్షియల్ గ్యాస్, ఇటు CNG కొరత తీవ్రమైంది. అగ్రరాజ్యం అమెరికా జోక్యంతో యుద్ధం ముదురుతుండటంతో.. సరఫరా వ్యవస్థ పూర్తిగా ఛిన్నాభిన్నమైంది. ఫలితంగా భాగ్యనగరం సహా తెలుగు రాష్ట్రాల్లోని ప్రధాన నగరాల్లో క్యాబ్ సర్వీసులు నిలిచిపోయే స్థితికి చేరగా, హోటళ్లు, హాస్టళ్లు బోర్డు తిప్పేసే దుస్థితి నెలకొంది.
అగ్రరాజ్యం అమెరికా ఇజ్రాయెల్కు వెన్నుదన్నుగా నిలవడంతో ఈ గొడవ కాస్తా ప్రపంచ యుద్ధం వైపు వెళ్తుందా అన్న ఆందోళన మొదలైంది. అయితే, ఇది కేవలం ఆ దేశాల మధ్య గొడవ మాత్రమే కాదు.. దీని సెగ నేరుగా తెలుగు రాష్ట్రాల గుమ్మం వరకు తాకింది. నిత్యావసరాల ధరల నుంచి ఐటీ ఉద్యోగాల వరకు, గల్ఫ్ వలసజీవుల బతుకు దెరువు నుంచి బంగారం ధరల వరకు అన్నీ ఈ యుద్ధ సెగలో కాలిపోయే ప్రమాదం కనిపిస్తోంది.
తెలుగు రాష్ట్రాల నుంచి, ముఖ్యంగా తెలంగాణలోని నిజామాబాద్, కరీంనగర్ జిల్లాల నుంచి, ఏపీలోని కోస్తా ప్రాంతాల నుంచి లక్షలాది మంది గల్ఫ్ దేశాల్లో ఉపాధి పొందుతున్నారు.తిరుగు ప్రయాణం తప్పదా? యుద్ధం గనుక తీవ్రమైతే గల్ఫ్ దేశాల్లో ఆర్థిక మందగమనం ఏర్పడుతుంది. కంపెనీలు మూతపడితే మన వాళ్లు ఉపాధి కోల్పోయి ఖాళీ చేతులతో తిరిగి రావాల్సిన పరిస్థితి వస్తుంది.విదేశాల నుంచి వచ్చే డబ్బు మీద ఆధారపడ్డ వేలాది కుటుంబాలు వీధిన పడే ముప్పు ఉంది. ఇది రెండు రాష్ట్రాల ఆర్థిక వ్యవస్థపై ప్రతికూల ప్రభావం చూపుతుంది.
యుద్ధం మొదలైతే అంతర్జాతీయంగా క్రూడాయిల్ సరఫరాకు ఆటంకం ఏర్పడుతుంది. దీంతో పెట్రోల్, డీజిల్ ధరలు పెరిగితే ఆ భారం నేరుగా రవాణా రంగంపై పడుతుంది. తద్వారా కూరగాయలు, నిత్యావసర వస్తువుల ధరలు ఆకాశాన్ని తాకుతాయి. భారత్ అత్యధికంగా పామాయిల్ మరియు ఇతర నూనెలను దిగుమతి చేసుకుంటుంది. యుద్ధం వల్ల ఓడల రాకపోకలు నిలిచిపోతే వంట నూనెల ధరలకు రెక్కలు వస్తాయి.
పర్యావరణం పేరుతో ప్రభుత్వం సీఎన్జీ వాహనాలను ప్రోత్సహించింది కానీ, ఇప్పుడు ఆ గ్యాస్ దొరక్క వేలమంది డ్రైవర్లు రోడ్డున పడ్డారు. హైదరాబాద్లోని సీఎన్జీ స్టేషన్ల వద్ద కిలోమీటర్ల మేర క్యూలు కనిపిస్తున్నాయి. ఒక్కసారి గ్యాస్ కొట్టించుకోవడానికి 6 నుంచి 8 గంటలు వేచి చూడాల్సి వస్తోంది. దీంతో రోజువారీ సంపాదన సున్నా అవుతోందని క్యాబ్ డ్రైవర్లు ఆవేదన వ్యక్తం చేస్తున్నారు.గ్యాస్ కొరత వల్ల చాలామంది డ్రైవర్లు ఏసీలు వేయడం మానేశారు. కొరత ఇలాగే కొనసాగితే ఓలా, ఉబెర్ వంటి సర్వీసులు పూర్తిస్థాయిలో నిలిచిపోయే ప్రమాదం ఉంది. ఐటీ ఉద్యోగులు, సామాన్య ప్రయాణికులకు ఇది పెను భారంగా మారనుంది.
హైదరాబాద్ వంటి నగరాలకు ఐటీ, ఫార్మా రంగాలు వెన్నెముక. అమెరికా ఈ యుద్ధంలో ప్రత్యక్షంగా పాల్గొంటే అక్కడి ఆర్థిక పరిస్థితి దెబ్బతింటుంది.అమెరికా క్లయింట్లు తమ ఖర్చులను తగ్గించుకుంటే హైదరాబాద్లోని ఐటీ కంపెనీలకు వచ్చే ప్రాజెక్టులు తగ్గుతాయి. ఫలితంగా మళ్ళీ ఉద్యోగాల కోత Lay-offs మొదలయ్యే ప్రమాదం ఉంది. ఏపీలోని ఫార్మా హబ్స్ నుంచి వెళ్లే మందుల ఎగుమతులకు కంటైనర్ల కొరత ఏర్పడి వ్యాపారాలు దెబ్బతింటాయి.
హైదరాబాద్ ఐటీ కారిడార్లోని వేల హాస్టళ్లు, పీజీ హాస్టళ్లుకు గ్యాస్ సరఫరా 75 శాతం మేర పడిపోయింది. దీంతో చపాతీలు, దోశలు వంటి టిఫిన్లు మానేసి, కేవలం అన్నం, పప్పుతోనే సరిపెడుతున్నారు. పరిస్థితి విషమిస్తే హాస్టళ్లను తాత్కాలికంగా మూసివేస్తామని యజమానులు హెచ్చరిస్తున్నారు. ఇప్పటికే వంట నూనెలు, పప్పుల ధరలు పెరగగా, ఇప్పుడు గ్యాస్ దొరకకపోవడంతో హోటల్ యజమానులు డైలమాలో పడ్డారు. కమర్షియల్ సిలిండర్ ధరలు బ్లాక్ మార్కెట్లో భారీగా పలుకుతుండటంతో సామాన్యుడి భోజనం ఖరీదైపోతోంది.
యుద్ధం వంటి అనిశ్చితి నెలకొన్నప్పుడు ప్రపంచవ్యాప్తంగా ఇన్వెస్టర్లు సురక్షితమైన పెట్టుబడిగా భావించే బంగారం వైపు మళ్లుతారు. దీనివల్ల బంగారం ధరలు అడ్డూఅదుపు లేకుండా పెరిగిపోతాయి. ఇప్పటికే తులం బంగారం ధర చుక్కలు చూపిస్తుండగా, యుద్ధం కొనసాగితే సామాన్యుడు బంగారాన్ని కళ్ల చూడటం కూడా కష్టమేనని విశ్లేషకులు హెచ్చరిస్తున్నారు.
తెలుగు రాష్ట్రాల్లోని మధ్యతరగతి ప్రజల బతుకు చిత్రం ఛిన్నాభిన్నం అయ్యే అవకాశం ఉంది. ప్రభుత్వాలు ఇప్పుడే అప్రమత్తమై, గల్ఫ్ నుంచి వచ్చే వలస బాధితుల కోసం ప్రత్యామ్నాయ మార్గాలు ఆలోచించాల్సిన సమయం ఆసన్నమైంది.గల్ఫ్ మంటలు మన పొయ్యిల్లో మంటను ఆపేలా ఉన్నాయి. యుద్ధం త్వరగా ముగిసి సరఫరా పునరుద్ధరించబడకపోతే, తెలుగు రాష్ట్రాల్లో ఇంధన సంక్షోభం సామాజిక సంక్షోభంగా మారే ప్రమాదం పొంచి ఉంది. కేంద్ర, రాష్ట్ర ప్రభుత్వాలు వెంటనే స్పందించి ప్రత్యామ్నాయ ఇంధన వనరులపై దృష్టి సారించకపోతే ముప్పు తప్పదు!
