తెలంగాణ రాజకీయ యవనికపై ఇప్పుడు యుద్ధం మొదలైంది. ఒకవైపు అధికారాన్ని కోల్పోయిన కసితో అస్త్రశస్త్రాలను సిద్ధం చేసుకున్న బీఆర్ఎస్, మరోవైపు దూకుడు పెంచుతున్న బీజేపీ.. ఈ రెండు పార్టీల ఉమ్మడి లక్ష్యం ఇప్పుడు అధికార కాంగ్రెస్ పార్టీయే! ప్రజా సమస్యలను అస్త్రంగా చేసుకుని, క్షేత్రస్థాయిలో సెంటిమెంట్ను రగిలిస్తూ విపక్షాలు ‘సర్జికల్ స్ట్రైక్’ చేస్తుంటే.. కాంగ్రెస్ కోటలో మాత్రం వింత నిశ్శబ్దం ఆవరించింది. ప్రభుత్వంపై విమర్శల దాడి జరుగుతున్నా, సమర్థంగా తిప్పికొట్టాల్సిన సీనియర్లు మౌనంగా ఉండటం ఇప్పుడు రాజకీయ వర్గాల్లో పెను సంచలనంగా మారింది. అసలు ఈ మౌనం వెనుక ఉన్నది వ్యూహమా? లేక వైఫల్యమా? అన్నది మిస్టరీగా మారింది.
ప్రతిపక్షాల ఆరోపణలకు ధీటైన సమాధానం ఇవ్వడంలో ద్వితీయ శ్రేణి నాయకత్వం వెనుకబడిపోతోందనే వాదన వినిపిస్తోంది.పార్టీలోని సీనియర్ నేతలు క్లిష్ట సమయాల్లో మౌనం వహించడం లేదా అంశాలను పట్టించుకోకపోవడం పార్టీకి నష్టం చేకూరుస్తోందనే విమర్శలు వెల్లువెత్తుతున్నాయి.ప్రస్తుతం రాష్ట్ర రాజకీయాల్లో రెండు ప్రధాన అంశాలు కాంగ్రెస్ ప్రభుత్వాన్ని ఇరకాటంలో పడేస్తున్నాయి.
గాంధీ సరోవర్ నిర్మాణం ఈ ప్రాజెక్టు చుట్టూ అల్లుకున్న రాజకీయ వివాదాలను ప్రతిపక్షాలు తమకు అనుకూలంగా మార్చుకుంటున్నాయి.మరోవైపు ఖమ్మం జిల్లా వెలుగుమట్లలో పేదల ఇళ్ల కూల్చివేత అంశంపై విపక్షాలు తీవ్ర స్థాయిలో విరుచుకుపడుతున్నాయి. ఇది ప్రభుత్వ వ్యతిరేకతకు దారితీసే అవకాశం ఉన్నప్పటికీ, కాంగ్రెస్ నాయకత్వం దీనిపై సరైన వివరణ ఇవ్వడంలో విఫలమైందనే అభిప్రాయం వ్యక్తమవుతోంది.
ఖమ్మం జిల్లా కేంద్రంలోని వెలుగుమట్లలో సుమారు 600 ఇళ్లను కూల్చివేయడం రాష్ట్రవ్యాప్తంగా సంచలనం సృష్టించింది.భూదాన్ భూముల వివాదం: సర్వే నంబర్లు 147, 148, 149లలో ఉన్నవి భూదాన్ భూములని, వీటిపై గతంలో హైకోర్టు ‘స్టేటస్ కో’ విధించిందని బీఆర్ఎస్ నేతలు వాదిస్తున్నారు. భూదాన్ భూముల ఉద్దేశమే పేదలకు నివాసం కల్పించడం అయినప్పుడు, వాటిని ఎలా కూల్చుతారని వారు ప్రశ్నిస్తున్నారు.
మాజీ మంత్రులు కేటీఆర్, హరీష్ రావు స్వయంగా వెలుగుమట్లకు వెళ్లి బాధితులకు అండగా నిలిచారు. క్షేత్రస్థాయిలో ఆందోళనలు చేపట్టి ప్రభుత్వంపై తీవ్ర విమర్శలు గుప్పించారు. జిల్లాకు చెందిన కీలక మంత్రులు పొంగులేటి శ్రీనివాస్ రెడ్డి, తుమ్మల నాగేశ్వరరావు ఈ విషయంలో సరైన రీతిలో స్పందించలేదని ఆరోపణలు వస్తున్నాయి. మంత్రి పొంగులేటి బాధితులకు ప్రత్యామ్నాయ ఇళ్లు ఇస్తామని ప్రకటించినప్పటికీ, క్షేత్రస్థాయిలో ఆ దిశగా అడుగులు పడకపోవడం ప్రభుత్వానికి తలనొప్పిగా మారింది.
బాపూఘాట్ సమీపంలో ప్రపంచంలోనే అతిపెద్ద మహాత్మా గాంధీ విగ్రహాన్ని ఏర్పాటు చేసి, ఆ ప్రాంతాన్ని ‘గాంధీ సరోవర్’గా అభివృద్ధి చేయాలని ప్రభుత్వం భావిస్తోంది. అయితే ఈ ప్రాజెక్టు అమలులో ఎదురవుతున్న సవాళ్లు రాజకీయ రంగు పులుముకున్నాయి.మూసీ నది పరివాహక ప్రాంతంలోని ఎఫ్.టి.ఎల్ , బఫర్ జోన్లలో ఉన్న అక్రమ నిర్మాణాలను తొలగించే ప్రక్రియపై స్థానికుల్లో తీవ్ర వ్యతిరేకత వ్యక్తమవుతోంది. అభివృద్ధి పేరుతో పేదల గూడు చెడగొడుతున్నారని బీఆర్ఎస్, బీజేపీ నేతలు మండిపడుతున్నారు. గాంధీ సరోవర్ ప్రాజెక్టు వెనుక భారీ వ్యూహం ఉందని, ఇది కేవలం పర్యాటక అభివృద్ధి మాత్రమే కాదని విపక్షాలు ఆరోపిస్తున్నాయి.
బాపూఘాట్ సమీపంలో ప్రపంచంలోనే అతిపెద్ద గాంధీ విగ్రహం, ‘గాంధీ సరోవర్’ ఏర్పాటు చేయాలన్న ప్రభుత్వ సంకల్పం ఇప్పుడు వివాదాలకు కేరాఫ్ అడ్రస్గా మారింది. మూసీ పరివాహక ప్రాంతంలోని FTL, బఫర్ జోన్లలో ఉన్న అక్రమ నిర్మాణాలను తొలగించేందుకు అధికారులు నోటీసులు జారీ చేశారు. తాజాగా మధు పార్క్ రిడ్జ్ అపార్ట్మెంట్ నివాసులకు కూడా నోటీసులు అందడంతో సామాన్యుల్లో ఆందోళన మొదలైంది. వరద నివారణ, నగర సుందరీకరణ కోసమే ఈ కఠిన నిర్ణయాలు తీసుకుంటున్నామని అధికారులు చెబుతున్నప్పటికీ, ప్రజల్లోకి ఈ సందేశం బలంగా వెళ్లడం లేదు.
బీఆర్ఎస్ నేతలు కేటీఆర్, హరీష్ రావు ప్రతి చిన్న అంశాన్ని అందిపుచ్చుకుంటూ ప్రభుత్వంపై, ముఖ్యమంత్రి రేవంత్ రెడ్డిపై వరుస విమర్శలు గుప్పిస్తున్నారు.చిన్న సమస్యలకైనా రాజకీయ రంగు పులుముతూ ప్రజల్లో ప్రభుత్వంపై వ్యతిరేకత పెంచేలా విపక్షాలు పావులు కదుపుతున్నాయి. క్షేత్రస్థాయిలో ప్రభుత్వ పథకాలు, నిర్ణయాల వెనుక ఉన్న అసలు ఉద్దేశాలను వివరించడంలో కాంగ్రెస్ సీనియర్ నేతలు విఫలమవుతున్నారనే చర్చ పార్టీ వర్గాల్లోనే సాగుతోంది. ప్రభుత్వ విధానాలపై నిరంతరం విమర్శలు చేస్తూ ప్రజల్లో ఒక రకమైన గందరగోళాన్ని సృష్టించడంలో విపక్షాలు సఫలమవుతున్నాయని రాజకీయ విశ్లేషకులు భావిస్తున్నారు.
విపక్షాల విమర్శలను పట్టించుకోకుండా పని చేసుకుపోవాలనేది ప్రభుత్వ వ్యూహమా? లేక సరైన సమాచారం లేక సీనియర్లు మౌనంగా ఉంటున్నారా? అన్నది మిస్టరీగా మారింది. విపక్షాల ఆరోపణలు నిజమని ప్రజలు నమ్మే ప్రమాదం ఉందని, దీనివల్ల క్షేత్రస్థాయిలో పార్టీ కార్యకర్తలు ఇబ్బంది పడుతున్నారని సమాచారం.ప్రభుత్వంపై జరుగుతున్న దాడులను తిప్పికొట్టడంలో కొద్దిమంది నేతలు మాత్రమే ముందు వరుసలో కనిపిస్తున్నారు.
ఎంపీ చామల కిరణ్ కుమార్ రెడ్డి, ఎమ్మెల్సీలు అద్దంకి దయాకర్, బల్మూర్ వెంకట్ వంటి యువ నేతలు మాత్రమే మీడియా వేదికగా విపక్షాలకు కౌంటర్ ఇస్తున్నారు. వెలుగుమట్ల కూల్చివేతలు, గాంధీ సరోవర్ వంటి కీలక అంశాలపై సంబంధిత మంత్రులు, సీనియర్ నేతలు మౌనం వహించడం పార్టీ కేడర్ను విస్మయానికి గురి చేస్తోంది.
రాజకీయాల్లో మౌనం ఎప్పుడూ సమాధానం కాదు. సమయానుకూలంగా ప్రత్యర్థుల ఎత్తుగడలను చిత్తు చేయకపోతే, అది ప్రజల్లో వ్యతిరేకతకు దారితీసే అవకాశం ఉంది. విపక్షాలు ప్రతీ చిన్న అంశాన్ని రాజకీయం చేస్తూ ‘పర్సెప్షన్ పాలిటిక్స్’ ఆడుతున్న వేళ, కాంగ్రెస్ అధిష్టానం మేల్కోకపోతే భారీ మూల్యం చెల్లించుకోవాల్సి వస్తుంది. కాంగ్రెస్ మౌనం వెనుక ఏవైనా రహస్య వ్యూహాలు ఉన్నాయా? లేక సమన్వయ లోపంతోనే ఈ పరిస్థితి తలెత్తిందా? అన్నది కాలమే నిర్ణయించాలి. ఏది ఏమైనా, తెలంగాణ రాజకీయాల్లో ఇప్పుడు బంతి కాంగ్రెస్ కోర్టులోనే ఉంది!
