ఆంధ్రప్రదేశ్ రాజకీయాలు ఒక్కసారిగా హీటెక్కాయి. గత కొంతకాలంగా సైలెంట్గా ఉన్న వైఎస్సార్ కాంగ్రెస్ పార్టీ (YSRCP) ఫైర్బ్రాండ్, మాజీ మంత్రి కొడాలి నాని (Kodali Nani) మళ్లీ గేర్ మార్చారు. వైసీపీ అధినేత వైఎస్ జగన్ మోహన్ రెడ్డి నిర్వహించిన కీలక సమావేశం అనంతరం మీడియా ముందుకు వచ్చిన ఆయన, టీడీపీ-జనసేన-బీజేపీ కూటమి ప్రభుత్వంపై తీవ్ర స్థాయిలో విరుచుకుపడ్డారు.ముఖ్యమంత్రి చంద్రబాబు నాయుడు బాడీ లాంగ్వేజ్ను, ఆయన మాట్లాడే తీరును ఇమిటేట్ చేస్తూ కొడాలి నాని చేసిన వ్యాఖ్యలు ఇప్పుడు సోషల్ మీడియాలో విపరీతంగా వైరల్ అవుతున్నాయి.
చంద్రబాబు యాక్టింగ్పై కొడాలి నాని సెటైర్లు
ప్రెస్ మీట్లు, బహిరంగ సభల్లో చంద్రబాబు నాయుడు చేతులు తిప్పుతూ మాట్లాడే హావభావాలను కొడాలి నాని ఇమిటేట్ చేసి చూపించారు.
“బాబుగారు వస్తారు.. చేతులు తిప్పుతూ పెద్ద పెద్ద మాటలు చెప్తారు. విజన్-2047 అంటారు, గ్లోబల్ సమిట్ అంటారు.. తీరా చూస్తే రాష్ట్రంలో రూపాయి పెట్టుబడి లేదు. ఈ డ్యాన్సులు, ఈ సొల్లు కబుర్లు తప్ప ఈ రెండేళ్లలో చంద్రబాబు ఏం పీకారు? ఏ ఒక్కరికైనా ఉద్యోగం ఇచ్చారా?” అని నాని ఘాటుగా ప్రశ్నించారు.
మోదీ, పవన్ కల్యాణ్లు చంద్రబాబు కంటే సీనియర్లా? వారికి వంగి వంగి దండాలు పెట్టడం వెనుక ఉన్న రహస్యం ఏంటని ఆయన నిలదీశారు.
కూటమి ప్రభుత్వంపై కొడాలి నాని గుప్పించిన 5 ప్రధాన ప్రశ్నలు
కూటమి రెండేళ్ల పాలనను టార్గెట్ చేస్తూ కొడాలి నాని ఐదు ముఖ్యమైన అంశాలపై ధ్వజమెత్తారు:
-
ఉద్యోగాల కల్పనలో విఫలం: ఐటీ, యువజన శాఖ మంత్రిగా ఉన్న నారా లోకేష్ తన శాఖను సక్రమంగా నడపలేకపోతున్నారని, యువతకు ఉద్యోగాలు ఇవ్వడంలో ఘోరంగా విఫలమయ్యారని ఆరోపించారు.
-
కక్షసాధింపు రాజకీయాలు: కూటమి ప్రభుత్వంలో అభివృద్ధి ఎక్కడా కనిపించడం లేదని, వారి ‘రెడ్ బుక్’ లో ఉన్నది కేవలం వైసీపీ నేతలపై కక్షసాధింపులేనని మండిపడ్డారు.
-
హామీల డైవర్షన్: ఎన్నికల సమయంలో ఇచ్చిన ‘సూపర్ సిక్స్’ హామీల నుండి ప్రజల దృష్టిని మళ్లించడానికే చంద్రబాబు కొత్త డ్రామాలకు తెరతీస్తున్నారని విమర్శించారు.
-
రాష్ట్ర ప్రయోజనాల నిర్లక్ష్యం: ఢిల్లీ పెద్దలకు వంగి వంగి దండాలు పెట్టడం తప్ప, కూటమి నేతలకు రాష్ట్ర ప్రయోజనాలు పట్టడం లేదని ఎద్దేవా చేశారు.
-
మళ్లీ వెన్నుపోటు రాజకీయం: నాడు స్వర్గీయ ఎన్టీఆర్ను ఎలా మోసం చేశారో.. నేడు సూపర్ సిక్స్ పేరుతో ఐదు కోట్ల ఆంధ్రప్రదేశ్ ప్రజలను చంద్రబాబు అలాగే వెన్నుపోటు పొడిచారని ఆగ్రహం వ్యక్తం చేశారు.
‘గుంపులుగా వచ్చేది వాళ్ళు.. సింగిల్గా వచ్చే సింహం జగన్’
ముఖ్యమంత్రి చంద్రబాబు నాయుడికి కొడాలి నాని ఒక బహిరంగ సవాల్ విసిరారు. దమ్ముంటే, ధైర్యముంటే వైఎస్ జగన్తో నేరుగా చర్చకు రావాలని డిమాండ్ చేశారు.
“గత ఐదేళ్ల మా వైసీపీ పాలనలో జరిగిన అభివృద్ధి, సంక్షేమంపై.. ప్రస్తుత కూటమి ప్రభుత్వ పాలనపై ప్రజల సమక్షంలో చర్చించడానికి చంద్రబాబు సిద్ధమా? ఎంతమంది గుంపులుగా వచ్చినా, కూటములు కట్టినా.. సింగిల్గా వచ్చే సింహం మా జగన్ మోహన్ రెడ్డి!” అంటూ కొడాలి నాని చేసిన చాలెంజ్ రాజకీయ వర్గాల్లో సంచలనం రేపుతోంది.
రాబోయే స్థానిక సంస్థల ఎన్నికల్లో అధికార పార్టీ బెదిరింపులకు భయపడే ప్రసక్తే లేదని, ప్రతి స్థానంలోనూ వైసీపీ గట్టిగా పోటీ చేస్తుందని స్పష్టం చేశారు. ఎక్కడా ఏకగ్రీవాలు కాకుండా క్షేత్రస్థాయిలో అప్రమత్తంగా ఉండాలని కార్యకర్తలకు పిలుపునిచ్చారు.
కౌంటర్ ఇస్తున్న తెలుగుదేశం పార్టీ (TDP)
కొడాలి నాని చేసిన వ్యాఖ్యలపై, సీఎం చంద్రబాబును ఇమిటేట్ చేసిన విధానంపై తెలుగుదేశం పార్టీ శ్రేణులు తీవ్రంగా మండిపడుతున్నాయి. గుడివాడలో ఘోరంగా ఓడిపోయిన నానికి మైండ్ పోయిందని, అందుకే ఫ్రస్ట్రేషన్లో ఇష్టమొచ్చినట్లు మాట్లాడుతున్నారని టీడీపీ నేతలు కౌంటర్ ఇస్తున్నారు.
ఏది ఏమైనా.. ఏపీ రాజకీయాల్లో కొడాలి నాని రీ-ఎంట్రీతో సరికొత్త పొలిటికల్ హీట్ పెరిగింది. ఈ విమర్శలను కూటమి ప్రభుత్వం ఎలా తిప్పికొడుతుందో చూడాలి.
